ياأم المؤمنين
والنبي المعصوم
منين الأيمان بيكون
والوطن
من فعل الحنين محروم ؟!
منين القلب راح يبقى
والنبض م الوجع مهزوم ؟!
منين هانكون ؟!
والكون بيرفض إنه يكون
والغربة دايرة جوه القلوب بالزيف
وبِتقَطّع حبل الأمل بالخوف
والشوف
زي النَفَّس مخطوف
بيمشي في الضلمة بالأمر والتكليف
والعيشة لو في رغيف
يبقى الكلام محروق
مخنوق
من صاحب الساقية
ومن عقد النخاسة
ودخول القفص بالدور
وعمر النور مازار عيني
ولو زارها لابد م التفتيش
إزاي يعيش الحق في الضلمة ؟!
وإزاي يكون الحلم بالتهميش ؟!
وإزاي أعيش ؟!
وإزاي أكون وسط الجنون
طول ما الهروب موصوف
الرب لو بيشوف
ما كانش ساعتها يبقى كفيف
الرب م العمى محذوف
الرب جوه القلب
زي الملح في جروحنا
وزي الخرس وقت الكلام
والبوح
الرب لو في الروح
ما كانش مات
واحترف السكات
من تمانية وعشرين سنة
دابت ملامحي جوه براويز الخشب
واتنهب مني اللي فات
واتسلب كل اللي جي
واتصلب على جزوع النخل قلبي
من سكات
واترمى عقلي في شتات
زي النبات
اللي القدر سابه فريسة للوهن والموت
مضطر للهجرة
والبُعد عن زحمة الملكوت
وعن واقع حال المدينة
والعفن اللي سكن وسط البيوت
ولو ع الصوت
فياريت يفوت من زحمة الأيام
اللي بتكسر نِفس اليتيم م الهم
مربوط في إيدي الدم
واللعنة والبركات
عشان الناسوت بفضل لاهوت
في الأرض والسماوات
عشان صلاة الجنازة
وصوت الحسين
وقراءة الفاتحة
والباقيات الصالحات
عشان الأمل
وأنت الأمل اللي بيسقي لهفتي
وبيحضن الدعوات
عشان الحياة
أبداً ما كانت موت
ده المساوة ع الحياة
جوه أبعاد التابوت: سرقة
والسرقة جوه المرار بتغم
وبتقصف الأحوال
وإسألي العمال
وإن كان ماليش إني أحاسبك
ف ليا وفي حضنك: صليب
خلاني في كف الأرض
وف كفك
يقين ممدود
ومولود
زي الفجر م المادنة
وموعود
بالنظرة والتسبيح
وقت اللقا
ووقت الوجود
والعود
موجود المطر في الحلم
والمطر في الحالتين حقيقة
والحقيقة هي أنتِ
أيوه أنتِ يا حبيبتي
-لو تعرفي-
وبيكي بأكون
■ ■ ■
16/11/2013
