" واحد وطن ... دورجي "
.........
واحد وطن .. دور .. جي
سرقوا ألواني من دُرْ .. جي
مع إني كنت نا دورجي
وأُسطى و ستور .. جي
طالع على بُرْ .. جي
برسم ولد على بنت
واحد وطن محبوس
واحد وطن عادة
ونا اللى كانت قهوتي زيادة
دلوقتى برسم اللوحة سادة
من غير وش
زي المشاعر المتعادة
مشاعر ماشفتش زيها
بتتكسر الرقصة على وسطها
دلوقتي بس عِرِفْت إني مش أدَّها
وان اللى فوق خدَّها
راح
والتوت اللى كان على شفايفها مرتاح
راح
وسداح مداح
العين ادت ضهرها للعين
واتمسح كل الكلام م النِّني
واحد وطن جنِّي
لاعادت ضحكته تجنني
ولا خرج من المصباح
