خديلي من البلد طريقين ..
واسفلت اتقسم نصين ..
وبيت مصلوب بحتة طين ..
خديلي من الليالي رصيف ..
وقطعة نور ف عز الصيف ..
ورجالة عرقها يشر ...
ف غزوة ..
يوماتي لاجل رغيف ..
خديلي من الطرق زحمة ..
وناس عايزة كيلو اللحمة ..
وعم شيطان ومراة اب ..
مفيش ف قلوبهم الرحمة ..
خديلي من السجون خانة ..
باكل اللقمة باهانة ..
وضربة ع الافا
بتوجع ..
كرامتنا اللي متهانة ..
خديلي من الوجع زنازين ..
وصرخة ام وبكا طفلين ..
سارينة وحاشية تخطف اب ..
وبتسيب الجراح فدادين ..
خديلي من المهانة سكوت ..
وضحكة بت ساعة الموت ..
محساش بالالم عادي ..
كأن الطلقة طلقة صوت ..
خديلي من العلام اسمه ..
وبت وواد بيقتسموا ..
رغيف م الجوع ..
خديلي كل شئ ممنوع ..
خديلي من الوطن رسمه ..
خديلي من البلد حارة ..
كنيسة .. قطر .. عبارة ..
وبت شايلة جثة بت ..
تزلزل دولة باشارة ..
خديلي من اللي مات اصرار ..
وضلمة رافضة اي نهار ..
خديلي من الحدود اسوار ..
بتدي ضهرها للخل ..
وتفتح بحري للاشرار ..
خديلي من الورق رشوة ..
وطفل ينام بدون عشوة ..
ودم عيال بيتصفي ..
وناس فرحانة وبنشوة ..
خديلي ف المطار حاجة ..
تخليني افكر تاني ف الرجعة ..
وابوس ايدك متخدعنيش، ..
وكوني مذاكرة ومراجعة ..
عشان قلبي اللي حبك يوم ..
ما طابش لسه م الوجعة .
