الضرب ف الميت حرام
------------------------
ما تطبطبيش على جرح
ممكن يتفتح بالطبطبة
وبلاش تخشي جوه اوضة متربة
ومرطبة الاحلام على حيطانها القديمة
سيبي اللى مقفول للأفول
ومترسميش بين نقطتيني
أي قطعة مستقيمة
مش كل حاجة تفهميها تنفعك
ولا كل غامض يوجعك
ويوقَّعك دايما فضولِك ف الغلط
قلبي اتظبط مرة بيرسم ضحكتين غامضين
ومن يومها اختفى
مع ان عمره ما اكتفى
بالصبر ف بلاد السهر
بس انبهر .. بالحسن لما ينصهر
ويكَّون المخاليق هناك
أهو لسة تايه ف الهناك
وهناك بتخلص كل حاجة مرتين
الطيبة داء الطيبين
والوقت داء السهرانين
والليل طويل جدا هناك .. والشمس حالة
واستحالة تدوم لحد
فبلاش بجد
تفتشي الليل اللى مات والذكريات
والمستبدات والغرام
ده الضرب ف الميت حرام
