بطلت أحب
وبجد
سكرت القلب بـ 100 مفتاح
و رميتهم جوا في قلب النيل
والنيل في بلادنا براح
وطويل
وغويط
وحويط
ولا حدش عندنا جابله قرار
وانا خدت قرار مش راجع فيه
انا بحكي بجد ، ومش إفيه
القلب خلاص قفلت عليه
ولا عدتش هافتحه تاني لحد
و طريق الشوق ، هافرشه بالشوك
وهاحط في أوله سد و سد
و السد كمان بعد ما أبنيه
راح اجيب العمر الفايت كله
بوجعه و مُرُه
و اعلقه زي الوشم عليه
وهاشَّهِد نور الشمس
وبكرا و امس
و كل سحاب الكون في سماه
و هاشهد كل كلام اللمس
وبَعْدُه الهمس
وكل حكاوي الليل وغناه
أيا خلق الله
اشهدوا واحفظوا ، ومحدش ييجي يقول معرفش
ان الاسيوطي الحب خلاص ده لَغَاه
واعتزل الحب تماماً نهائياً
لآجالٍ غير مسماه
