مصطفي البسيوني
سيجارة شابكة ف التانية
و قهوة وشاي بيتفقوا عليك بشويش
و ناس مخنوقة بتشيش
و ناس مشنوقة لجل تعيش
عيال من كتر ما بتضحك عنيها دموع
و غول من كتر ما بياكل ... تملي يجوع
و بنت ف عينها كام بوسة و ما اتحدفوش
و قلبَك شيش
بيسمح بس للنسمة و نص الضي
معاك مترين من الضحكة و لسه حزين
و ألف قصيدة يتكتبوا
ما يتنشروش
و كام نكتة عليك تطلع ... ولا اهتميت
و حلمك فالصو صدقني ما تستاهلوش
مشاهد يوم بتتكرر بشكل كئيب
لدرجة تخلي أيها عيب ف أحلامك
مهوّاش عيب
سيجارة شابكة ف التانية و موت ما بجيش
و قهوة ف مج تدّارى .... ماتشربنيش
و حزن تزقه ف الحيطه
مايتكسرش
و حلم تشوفه 100 مرة
ما يتفسَّرش
و ناس تهتم بيك تسأل
جرالك ايه ؟
تلاقي الضحك بيقاوح
بجد مفيـــش .!!
