عماد عامر
ما بقاتش بتشوف الحنان اللى ف عينيك
لما بايدها بتلمسك
ما بقاتش
بتشيل السلاسل
من روحها زى زمان
و تدخلك جواك
و ف انتظارك ليها
- قدام سى بواب القلق
بتفضى م الاحلام جيوبك
و تشيل وشوش الصبر
و تفتكر .
كم الامانى اللى منك اتسرق
حتفضى مين و تشيل ف مين؟
و اشمعنى هى بتوجعك
و تحسسك
بكل حاجه سبتها
مضطر تمشى للمره اللى كام
من غير ونس
و تحط بادج الابتلاء
على بدلة الحزنان قزى
يمكن سحابك يرتعش جواك
ف تشتيلك غناك
ساعات غناك بيريحك
( من ديوان على وش الاحلام )
