علاء عيسي
" شدِّى حيلك"
.............
انتِ بتقاومى
ونجحتى؟؟
أما أنا لسَّة باقاوم
فرق بينَّا
إنك قدرتى
بس أنا لسَّة باحاول
مركبك بالإسم ماشية
بس موش ماشية
بصحيح
مركبى فى الشكل واقفة
بس بتعافر
فى ريح
واقفة عينها ع الحياة
وانتى تايهة وراكبة مخك
ماشية عكس
الاتجاه
مدى إيدك
قاومى ويايا عشانك
ياللى عمرى كان عشانك
وانت سايبانى
لواحدى
سايبة نفسك ويا غيرى ولسة عاشقك
وانتى ضدِّى
بس موش هاقبل
مساومة
موش هابيعك لو بعمرى
رغم انى لسة باحبى ولسة
باتهجَّى المقاومة
حد عالم
يمكن أنجح
والمقاومة تجيب نتيجة
شدى حيلك .
يا عنيدة
علِّمينى أبقى زيِّك
هابقى أعند م العناد
واحدة واحدة هابقى قادر
وابقى واخد ع البعاد
ياللا قاومى
وشدى حيلك
آه يا ويلى
من بعادك
و من بعادى
آه
يا ويلك
شدى حيلك
ياللى حيلك داب وسايب
فيها إيه لو بس ترضى
وتعشقى قلبى اللى دايب
خدتى إيه من قلب شايب ؟
وانتِ عودك لسة أخضر
الحقى قلبى ف شبابه
وردك الدبلان يزهَّر
آدى إيدى
هاتى إيدك
موش عشانى وموش عشانك
قاومى ويانا عشانَّا
نبقى أقوى م اللى
باعك
يبقى نقدر ع اللى خاننا
لو وافقتى ؟
موش خسارة كل إحساسى اللى فيكى
لو رفضتى ؟
يبقى تستاهلى اللى حاصل كله ليكى
يبقى هارجع تانى أقولك :
يا حبيبتى
طظ فيكى
طظ فيكى
من ديوان طظيات
