وليد الأسيوطي
كان لي قلب
كان بيعشق عزف صوتك ع النايات
وفي حضورك كان بيحلالي السكات
و اما قالوا الخمرة ذنب ...
من عنيكي كنت بشرب
كنت بسكر !
كنت أحب السُكر منك
وأكره اللي يحوشني عنك
كنت بعشق خمر عينك لما تِسْكِر كل روحي بالساعات
واما قالوا العزف ذنب !
اتاخدت !
طب كيف يكون العزف ذنب
وانتي صوتك فرقة كاملة للموسيقى بالالات
كان لي قلب
كان بيعشق عزف صوتك ع النايات
النهاردة انا ليا قلب
مش بيعزف غير سكات
والبيانو خلاص رماه
والنوتات ./
والكمانجة كمان كسرها
والنايات ./
كان لي قلب
كان بيؤمن بيكي جدا
النهاردة انا قلبي قرر..
ان حبك كان له ذنب
وان فجر البعد أدن
النهاردة انا قلبي فعلا
جوا منه الحب مات
