محمد سمير مصباح
هنفارق والفُرقة طريق
نتصاحب .. هتكون لي صديق
هنوارب .. هتنط غريق
وانا مش بعرف اعوم برده
هنفارق وماهيش فارقة
نتصاحب .. ونصير رُفقا
هنوارب .. هنعيش غرقى
لو كان بحر أنا ف عرضه
هنفارق ونشوف غيرنا
نتصاحب .. علشان غيرنا
هنوارب .. وف تغييرنا
نصبح كورة بلياردو
هنفارق وهنتوسخ
نتصاحب .. ونقع ف الفخ
هنوارب .. وإلخ إلخ
إلي آخر قلبي ووِرده
هنفارق زي الأغراب
نتصاحب .. ربما أحباب
هنوارب والدنيا ضباب
ودا ربك ودي بقا أرضه.
