رضا الشاذلي
اليوم ده يوم النبى
صلوا عليه ياناس
ملك القلوب بالعدل
يمشى بلا حراس
الجد شافه فى المنام
لما اتولد سماه
حامل لواء الحمد
والرحمة المهداه
شافع شفيع للخلق
فى الاخره عند الله
.....................
نزل النبى ساجد
الكل قاموا ساجدين
زرع وشجر وجماد
حتى البذور فى الطين
وادى النبى العدنان
ماشى كما القران
داعى لكل الناس
مش بس للأعراب
دا للعجم للجن
ولكامل الاجناس
بُعث النبى فينا
رحمةً لينا
صلى عليه ياخال
فيه الكلام زينه
كان النبى ماشى
وجنبه ست عجوز
شال الحطب عنها
فقالتله خد بالك
نصيحه اقولهالك
لكلامى بكره تعوز
بيقولوا فيه واحد
نازل فى مكه يقول
امنوا ياناس بالله
وخلوا باقى القول
اوعاك ت آمن بيه
يمكن هُبل يهديه
ما تقولى يا ولدى
يا شهم اسمك اييييييييييييه
قام قالها محمد
آمنت فى ذات الحال
وقالتله عندى سؤال
راح ادخل الجنه ؟
جاوب نبينا وقال
" لا يدخل الجنه عجوز "
هتعودى للتلاتين
ملكه فى جِنان الله
حواليكى حورٍ عين
وفى مره جاله ضيوف
بعتوله من بيه
فى القصعه شئ موصوف
قوم امنا عيشه
م الغيره كسرتها
ضحك النبى وقالهم
الغيره غلبتها
قامت فكسرتها
هاتوا وعاء تانى
ولمّ فيه الاكل
مزعلش من امّنا
ولا منها تعب وكلّ
..................
وف يوم اتاله بعيد
ومسك فى جلاليبه
اعطينى م اللى معاك
وقرط عليه توبه
عمر الفاروق مقدرش
سحب عليه السيف
وحلف ما هيسيبه
قام النبى هدّاه
وقاله يا فاروق
أأمر بشرع الله
أأمر بحُسن الطلب
والحُسن فى الاداء
وادى النبى الرحمه
قرآن فى افعاله
صلوا عليه ياناس
نبى بلا حراس
موعود بحورٍ عين
اللى النبى دعاله
