أحمد خطاب
فارد إيديك
مكتوب على كفَّك نبي
عشِّمت إيدك بالمطر .. بارت
غربالك المتعبِّي سِرَك فيه .. كتوم
السِر : مفضوح ف العلَن
مابيعرفوش غير الوشوش العارفة بعض
مكتوب عليك السُهد حيرة
مكتوب عليك السُهد فَرْض
فايت ما بين الأسئلة
بتوزَّع الإجابات ...... نُقَط
ليه كل خطوَّة بتمشي فيها تكون غلط ؟
فارد عينيك على ناصية الشارع بتسأل
حد شافني ؟
أو عارفني ؟
أو عارفها ؟
حد شافها ؟
رعشة سحابة من السما
بتزلزل مِنَّك كيانَك
نقطة مطر نِزلت فى إيدَك
نبِّتِت إيدَك صورتها
حد شافها
رسمِت على كفَّك ملايكة
عشِّمت إيدك بالمطر .. صارت
_ مكتوب عليك تدبل عينيك م المطر
وعنيك بتكتب ذكرياتك صِوَر
مكتوب عليك تعيش عمرك خَطَر
والعمر لعبة يا صاحبى بتنتهى فِوَر _
غربالَك المتعبّى سِرك فيه .. طِهِق
يا سِر بيعاند فى نفسه
أشتهيك .. تِفْشى
أمشى ليك .. تِمْشى
يا سِر بوح للأسئلة
وبلاش توزَّع الإجابات ..... نقط
يا سِر حقق لك غَرَض
ـــــــــــــــــــــــــــــــــــــــــــــــ
من ديوان عنقود حياة
