أحمد أسامة
على ضوء ما بدوق طعم الدنيا
أنا عمري جعان..ليومين بهجة
من غير مشاوير..
من غير تفسير..من غير تبرير
انا نفسي اتكلم عن نفسي..
من غير ما تكتّفني اللهجة..
مع شجرة كلامها غنا العصافير
مع بحر بيسمع ما يردّش
مع ليلة نجومها ماتتعدّش
أو بنت تكون قادرة تدردش..
عن عشقي لغيرها..بدون ماتغيير
أنا عايز اقول..
أنا كنت بخير
يمكن وانا تلميذ فـ اعدادي
أو أصغر من عُمر ولادي
انا كنت جديد في الوقت ده لانج
كان صاحبي..
قتلته فـ دور شطرنج
فاتعلّم يقتل أحلامي
واتعلم يرميلي الطبية
بحصان ياكل كل ما يحوِد
واتعلّم يسبقني بخطوة..
مع انه بيلعب بالإسود !!
علّمني أزوّد..فـ السكر
واتكلّم وقت ما بيفكّر
علّمني اتبخر..فـ سجارة..
ولّعها بإيده وماشرِبهاش
فهّمني إن الوقت خسارة
لو تعشق بنت ماتلمسهاش
وفـ ضوء ما بدوق طعم الدنيا
فـ دفا الأحضان..وحاجات تانية
سرَحِت ثانية
وإديتني معاد..من يومها ماجاش!!
