أحمد فخري الأسواني
فى دولة الأغراب
الشمس متدفيش
والقمر مخنوق نوره ميضويش
قعدة ونس وصحاب
فمش غريب لو اعود
مسحوب كما الدراويش
لمصطبة شارع
حيطانه تحضن بعض
ولكلبه فى الشارع
نجرى نعاكسها
تجرى فتهبشنا
نضوى ليل رمضان
ماسكين عصايا وكوز
على قعدة الجدة
يتجمعوا الكتاكيت
وتحكى فى الحواديت
عن بنت بلديات
هز الهوا شالها
شافها بلديات
كان طالع النخلة
نزل قوام شالها
واحكى عن قلبى
واول حروف العشق
فى قصيدة مش كاملة
وشقاوة الثانوى
وتذاكر الجنة
وصوت بياعين القطر
ودفا حضن أصحابى
نعمل حروب ميه
نرحل فى نص الليل
راكبين مشاعرنا
نرجع فى وش الصبح
نغرق فى صحن الفول
يدفى ذى الشمس
لكن الغريب لو عدت
ملقتش ولا حاجة
وكأنها تخاريف
فى عقل واحد طق
