طالع ....لتحت
هيثم نور
طالع ....لتحت
كل مادا بلاقي نفسي ... إنسان أقل
الحاجات ليه طعمها ... عمال يقل
الفرح قل ......... الحزن قل
وأعشق ألاقي القلب ليه ... تعبيره قل
...........................
يوم ميلاد النفس ما بتعرفش ... خوف
يوم فيوم السكه بتخليك ... تشوف
تشتهي دوق الحاجات ... من غير كسوف
تلمس الدنيا بإيديك ... والعين تطوف
............................
والزمان يبدأ يعد
واللي جاي عمال يشد
واللي فات من العمر هد
وانت ليه عمال تمد ؟
............................
الخطاوي بتبعدك ... ما تقربكش
والحكاوي بتكتبك ... ما بتختاركش
الثواني تنقصك ... ما تزودكش
شمس بكره يا تلحقك... يا متلحقكش
............................
إيه في بكره بيناديك؟
وانت مش شايفه بعينيك
أيه في بعده فاكره ليك؟
وانت مش ماسكه بإيديك
.............................
النهار أجمل ما فيه .... فجر إبتدى
والغرام أصدق ما فيه .... بسمة رضا
قلب لسه بيتولد أصفى .... من قلب إهتدى
الكمال لله لوحده .... مهما طال بينا المدى
.............................
كل مادا بلاقى نفسى ... عمال أقل
كل ما أبعد عن بدايتي ... أفضل أقل
الحياه عماله تجري ... واللي يغواها يقل
الزياده بس لما ... يتغلط فيها أقل
