الحزن علامة صلاه فى القلب
أمينة عبد الله
الحزن علامة صلاه ف القلب
روحى
حوامه ف المكان كما ميت
و لحظة خروجها
ما كنتش صعبة
و كنت مرقباها بدقة
لحساب الوقت اللازم
لاتمام رحلتها
و الرجوع بهدوء
روحى كانت اخف من اى توصيف
* * *
كل الليالى
عند المهرج شبه بعضها
الا الليلة اللى عينه بكت فيها بجد
على حبل روحه اللى ما قدرش يمشى عليه
* * *
الوحدة
مش اربع حيطان
انا بينهم
الوحدة كرسى وحيد ف فضا روح
* * *
العطش
مش انك ما تشربش
العطش الحقيقى
ف الميه الممزوجة بحزن وحدتك
* * *
طيب
تفتكر ايه شكل الحزن ؟
البكا- مثلا -على وحدتك وسط صحابك
او حفلة التأبين اللى م حضرهاش حد
- ولو للذكرى -
طيب
لو مش هو البكا ؟
ممكن يبقى ........؟
* * *
ح يكون
مرجوعنا للمخزون
و الكلام عن ذكريات محفوفة بالخطر
لما اتسولت روحك لحظة ما عطشت
مروا عليها بعملة مخرومة
عشان الذكريات تعدى بشويش
و ما تحصلش ازمة ضميير لحد
ويكون مرجوعى
لنفس الفكرة المسيطرة علي
احنا ليه رخاص عندك يا رب ؟
