مقاطع من دفتر العشاق
عمرو شاهين
مقاطع من دفتر العشاق
الفجر
لحظه ولاده قيصّريه
للنهار
.....
الشاب اللى ب يحلم يكون اخيل
والبنت اللى مصرّه تعشقه
وتكون له فينوس
اتجمعوا سوا
على سلم المترو
فى انتظار اللحظه المناسبه للتعارف
فى الوقت ده
كان دون كيشوت
ب يحارب الاحلام فى عقله
وسندريلا ف عقلها
لسه ب تحلم ب الامير
الزحمه موسيقى زايده
ب تخنق رقه المشهد
نظره من عيونها الفرحانين لعينيه الحزينه
رساله طارئه
نقلت بيان الثوره ع التقاليد
ورغبه الايد الحريمى فى التلامس
كان القطار فى الوقت ده
داخل ب يحضن فى الرصيف
يكشف حقيقه الموقف ب جرءه
يختم الحاله ب جملة
ان الفراق
اول طريقهم للقا
.............
الفجر
قبله الام الحنونه
على خد النهار
.....
الشمس
ب تلعب المساكه مع البشر بين السحاب
الطريق
مرايا لامعه والسبب دمع السما
اهتزازات القطار
كانت رقيقه
كأن الارض ب تهنن ولادها
هى
كانت فى اخر ركن فى العربه
وهو
فى العربه المجاوره
حاجه فى بروده المقعد
اكدت ان اللقا لابد يحصل النهارده
طعم الدفا وابتسامه الموجودين
ضاعفوت شعورها ب التفاؤل والامان
ركنت امواج ضفاير شعرها على الازاز
بصت يمين
لمحت ملامحه ب تبتسم
المحطه
ايديها ب تندمج فى ايده ب قوه
جريوا سوا على سلم المترو
يحضنوا اللحظه ب براءه
و ب جنون
...............
الفجر
كلمه الليل الاخيره
للنهار
.....
البنت اللى زرعت حبها احلام
حصدت مرار اليأس
من قلب الولد
قصة الحب البريئه
رقصت على سلم مشاعرها
فى حيره بين
رعشة ايديه
ونظره النشوه ف عينيها
امتزاج اليأس ب الرقه
مع نكهه الزمن المعاصر
واعتصامات الاحبه على الرصيف
سم الخلاصه
وخلاصه المحنه
القطار جمّع ما بينهم
و فى النهايه
يدخل المشهد فى صمت
ويطرح مجرد تساؤل فلسفى
هل يجوز
السيندريلا
يكون اميرها
دون كيشوت ؟؟؟؟؟؟
