و كإن الموقف محصلشي
إبراهيم الصمدي
و كإن الموقف محصلشي
و كإن الناس معدتش تحس
و كإن الكون اصبح مليان
بكلاب و ديابة و عسكر بس
إغتصبوها !!
نزلت ليه من بيتها الاول .. لبست ليه لبس ميعجبناش .. الراجل حيوان متحول .. لو كانت حلوة ميرحمهاش ..
مستقبله ضاع !!
من صنع إيديه ..الكلية مش لمظاهرة او للشعارات .. لو كان خائف على نفسه البيه .. كان بات مكتوم زي البهوات ..
مش لاقي ياكل !!
الأمن أهم
و لا متعلم !!
بيعدي يا عم
ولا فيه حرية ولا كرامة
و لا عيش ولا نوم و لا شخصية
و ولاده السبعة كتير ياما
نادوا على عدالة إجتماعية
النور قاطع
و المية مفيش
نايم سقعان
لبسي ميكْفِيش
لو هتجوز
الشقة مفيش
باكل فضلات أصحاب القصر
عايش عالصدقة و عالبقشيش
- طب ساكت ليه !!
= ......ء
-طب ساكت ليه !!
= ......ء
-طب ساكت ليه !!
= أنا ... أنا نفسي أعيش
