صورة
هشام صبح
كان متعود ياخد هو الصورة
مابانشى ولامرة فى كادر
وصورة ورا صورة
جمع فى حياته كتير تصاوير
اللى بيضحك
واللى حزين
واللى حاول انه يكون عوام
مع انه واقف ع البر
خدعة صورة لجل العين
متشوفشى ايه المتدارى عليها
طول عمره شاطر فى التراكيب
جدران البيت مليانه كتير
ألبوم اتلملم عدى سنين
لكن برواز اتعلق فاضى فى صدر الباب
صورة كبيرة لجله لوحده
كان هو
ملقطهاش
وفى يوم مااتلقطت كان الاسود غطى ملامحه
حتى الضحكة
مضحكهاش
