من سيتينات قرن عدّا
عمرو شاهين
من سيتينات قرن عدّا
(1)
من زمان
من قبل ما تلّون خطاوى الحبر مريلتك
كنت عاشق
وكنتى ب تعشقى فعل الغرام
كنتى دايما
ب تلاقى الصعوبه فى محاولتك دق الجرس
قصيّره ؟
يمكن
بس فاكر
ان طولك كان مناسب للعبه المنديل
شعرك
كان مغطى فيونكه الفستان
وكان
ب يعمل مشكله وقت السباحه
طفله
وعاشقه لفكره التجريب
واللعب بالمكياج
ومصادقتك لكتاكيت الجيران
وعشقك المجنون لصورتك فى المرايا
وصلونى
لاتهامك ب الأختلاف
لكن
التحامك ب العروسه
خلانى
اصاحب سلم المدخل
وقطه الجاره
تنهيده من تنهيدات فيروز
فكرتنى
ب اول غنوه سمعناه سوا
وضحكك المحموم على حدوته البنت
ام المريله الكحلى
.............
(2)
اميره من سيتينات قرن عدّا
ب تحاول بأقصى جهدها
تتحاشى لفت الانتباه
وانا
ب احاول بكل طاقتى
اليق على الصوره
و أمثل انى (jan)جان
ترنيمه من ترنيمات سينما اللونين
بنت
ب تجرى بكل قوتها
على سلم الرقه
شعر
كان دايما داخل سبق
مع ضل ب ترسمه ع الحيط
نفحه من نسيم نيل المعادى
بعد اما مر
على غيط للبرتقان
فى موسم التلقيح
................
(3)
وانقطاع لعب العيال
واحتفاء قطه الجاره
كان نتيجه
لمحاوله واحده
كان غرضها الاتصال ب اللمس مابين خدك
وكفى
اهه من اهات الست
وصوتها المشبّع ب ضرخة الحسره
فى غنوتها الجديده ( فات الميعاد)
وصلتنى للتفلسف ف تصنيف البنات
والتسأول
عن سر العلاقه بين
ذكرى انتى فيها
والاغانى ؟
.................
(4)
يا بحر من نشوه الاطفال
فى لعب العرايس
يا نظره
من عينين ملايكه انجلو
الملزوقين ع السقف
محتاج اجابه للامانى المستحيله
محتاج لصدفه تلمنى على حته سابت حضن صدرى
ودابت
جوا سردابى المسمّى ب عقلى الباطن
محتاج لفرصه الم فيها ايدى
وارجع من جديد
طفل
ب يحاول يبقى رشدى اباظه
علشان يليق على طفله
من سيتينات قرن عدّا
