مخرج مناسب
أمينة عبد الله
بهيىء
نفسى لمرحلة جديدة من النضج
أحب فيها سنى،ملامحى
واقلل من استبداد طباعى.
ده له علاقة بوجودك
لتكملة محاولاتى فى فهم العالم اللى انت آخر خيط بيربطنى بيه
لفهم تعقيد بساطتك
ولربط الأسماء بالصفات المتماسة معاك.
بهيىء
جزء من الذكرى والتواريخ
مساحة من الأحاديث
سيباهالك بمنتهى الرضا
والترقب
الوضع الحالى ف نمط العلاقات
فى طرح المقبول واللا مقبول
مرن
بيسمح بتقبل الأشياء على علاتها
من غير حتى ما يدور على مبرر
يحفظ ماء الوجه
أو يوجد مخرج مناسب للتناقض مع النفس
أصبح كل شىء
له مبرر بكلمة
عادى
