خوف
هشام صبح
خوف
هو هو نفس الخوف
نفس الخوف من البدايات
نسى لما زمان
كان بيلف الدنيا بحالها
بيدور
بيخبط
يتكعبل ويقوم
بيدق بيبان لجلن مايلاقى طريق
يشبك أحلامه فى ضفاير بنت جميلة
يرسم دنيا جديدة
هو هو نفس الخوف
ماهو لسه واقف مستنى
ضحكته مره
أنيابه حرة
مستنى يخطف أحلامه
مستنى وبيمد ايديه
تتسمر رجليه
فى نفس المكان
الصور والذكريات
مالية الحيطان
حبة شوق
حبة خوف
شوية لخابيط
حبة تخبيط
جواه لسه نفس السؤال
من غير جواب
من غير عنوان
والزمن أبدا عمره
مبيرجعش لورا
كل اللى يقدر يعمله
انه يدوس على زرار
يرجع شريط أحلامه المهزومة
يفر فى راسه
تاخده لبعيييد
ستوب
هنا وقفت الحكاية
نفس النهايات المفتوحة
نفس الصرخة المكتومة
بتقوله
لسه للحكاية
جزء تانى
لسه اللى بيكتبها
سايب لخيالك انت
يرسم النهاية
