الحلم
أحمد البوهي
الحلم جواك ابتدا
يلعن فى اوجاعك دواه
الحلم صوت بيردّدك
لحظة ما بيردّد صداه
الحلم موت
وبينتهى فى الحلم موت
لحظة ولادة الف الف من الامل
انا مهما موتنى الخجل
برضك هعيد للحلم دقات الحياه
*****
انا حلم بيصارع خطاه
لحظة مرور المستحيل
انا نبض تاه
عاشق فى ضعف الناس مداه
انا خوف غريق
انا بحر صمت بيبتدى يجرفنى موجه لمنتهاه
وسط الطريق
.
.
.
انا شوق محال
انا نبرة الصوت العليل
لحظة ما بيموت الخيال
انا شوك فى ضهر الاحتمال
لأ مش كده!؟
انا حلم عاشق للقلوب الطيـّبه
لأ مش كده!؟
انا دمعة صعبة قريـّبه
لأ مش كده!؟
انا قصدى لما بيبتدى فى الحلم خوف
بيتوه حروف
كل اللى كان نفسى اكتبه
انا حلم بيدور المدار
جواه ضمير بيأنبه
جواه سكون
انا شوق بيعشقنى الجنون
انا مهما اكون .. بردك اسير الامنيه
لأ مش كده!؟
....انا قصدى ايه
انا قصدى غير كل اللى فات
انا حلم مات
مــ الضحك يمكن
بردو يمكن مــ السكات
وبيتولد مع كل موتة حلم
حلم
رافض يموت ......
رافض يخبيه السكوت .......
وبيتولد احساس عنيد
بيصارع القلب اللى ملياه الجروح
وبيرمى حمله على الطموح
ويتـــوه مع نبض الوريد
وبيجبر الخوف اللى ساكن ضلمته
يحلم .. يكون فى العمر قلب
يحلم .. يكون فى القلب حلم
يحلم.. يكون فى الحلم نبض جديد
