فراشة مش بتخاف م النور
أمير لبيب
فراشة
حلم
جنون
الوان ..
..
من برة
_________
هى الشجاعة اللى بتقدر
تحضن النور اللى ممكن
يحرق العمر اللى فاضل
و الانين
و الذكريات
الابتسامة اللى بتشبه
بسمة الورد اللى ماسك
باشتياق
فى ايدين بنات
___________
الوانها لوحة فن مش معروف
قادر يشدك ناحيته
فتداعب الكلمات شفايفك
تأمرك
انك تغازل حسنها
من غير كسوف
توجد علاقة مركبة
مابين جنونها
و بين سكوتك مكتئب
و تفسر الشيئ اللى رابط
عشقك
قراية الجرنان فى عز الضلمة
و لعبها بالضى
_________
الحلم كان من عمرها
ماقدرش يصبر ع النهار
ولا صبر قلبى كمان قدر ..
.. حطت على الورد اللى فتح
لما شافها من بعيد
ساذج يا زهر العاشقين
ساذج اوى
ماعرفش ان فراشة الحلم الصبى
كان يوم لقاها بيتبعه
يوم الوداع
______
مسكين
يا حلم فراشة بتعشق الازهار
و مسكينة
فراشة حلم جوايا
ماجتش مناسبة اطيرها
ففضلت فيا محبوسة
و خفت تروح بعيد عنى
و تهرب للزهور و الناس
فماتت جوة شرنقتى
و الوانى
و افكارى
و سابتنى
اكمل وحدى مشوارى
... مسكين انا
مسكين لأنى فى يوم حلمت
انى اكون
فراشة حرة و ليها عمر طويل
ماتخفش تجهر بالحياة
ولا يوم تخاف .. م النور
