ولسه بفرح بالمطر
أحمد سلامة
ولسه بفرح بالمطر
زي العيال..
وانزل ألفلف في الشوارع
واشتري علبة سجاير بالَّمُونت..
وافتكرني لما كُنت..
وافتكر،
صاحبي اللي كان من كام سنة..
وافتكر والدي اللي قاللي إن الدعا
وقت المطر
شيء مستجاب..
وان السما وقت المطر
لها ألف باب..
أفتح دراعي
أبص حبة للسحاب وانوي الدعا
أقول يا رب.
أدعي لأهلي
ولجيراني والصحاب.
وأقول يارب.
أصلي حبة ع الحبيب المُصطفى'
وأقول يا رب
وابص جمبي عالعجوز اللي عنيه
نورها انطفى
واقول يا رب.
ملقيش في نفسي أي رغبة م الدعا
غير الدعا !!
فاضحك قوي
ضحكة بصحيح مالقلب !!
واضحك كمان
ضحكِة جدع مالغُلب..
واقول كمان وكمان يا رب..
غلبان صحيح فرحة وحماس
بس ابن ناس..
وارجع ألفلف من سكات وسط الميدان
تحت المطر،
والناس.
