السفر فى جناين الغنا
زين العابدين فؤاد
السفر فى جناين الغنا
مقاطع من الغنا واللون
غنا:
والله وسكرتينى
ياليله
جبتى البارود لاحمر
وسكرتينى
والله وحيرتينى
ياليله
ورقصتى بالخنجر
ماعلمتينى
والله ودوختينى
ياليله
جوه عينيكى الواسعه
سفرتينى
والله وتوهتينى
ياليله
جوه بلادى الضايعه توهتينى
من يافا خدتينى لرملة سينا
والرملة تحسب لى شهورى، سنينى
وسنينى واقفة، بيارات عريانه
نابلس بعيدة، والعرب عطشانه
والنيل مسافر جنبى
مابيروينى.
ألوان
نطرح سوا، ياجناين الحواديت
نعرف نقيم تانى البيوت، والمغنى
نرجع نفرق بين حلاوة التوت
وطراوة الحنه
نعرف نفرق بين غنا الالوان،
بكا الألوان:
الأحمر النارى
الأحمر الورده
الأحمر الرمان
الأحمر الرمله
الأحمر المزرق
الاحمر الكتوم فى لحم السكوت
الأحمر القتال، الأحمر القتلى
الأحمر المحروق فى طين البيوت
الأحمر المسروق فى شمس الشهدا
الأحمر المحاياه، الأحمر الغله
الأحمر المخضر
الاخضر الزرعى
الاخضر، الفرح الجيد، الضمه والقبله
الاخضر، الاخضر
الاخضر المزرق
الازرق الصيفى
الازرق البحار
الأزرق المينا
الازرق البحر اللى ماسافر
الازرق الصافى
قرار القرار
الازرق المبلول
الازرق الكرباج فى لحم الخيول
الازرق الباهت
الازرق الساكت
الازرق الزاعق فى شفة جوع
الازرق الدموع
الازرق المصفر
الاصفر، التجار
الاصفر، الرمله
الاصفر القتال، الاصفر القتلى
نعرف نفرق بين بكا الالوان
غنا الالوان
نخرج سوا بره البيوت
أرقص وأنا عريان
عريان أهه، ما ف ضهرى غير خنجر
ما ف صدرى غير بستان
ما ف شعرى غير ريحة ندا الشهوة
النهد، والبرتقال
أرقص وأنا عريان
وكفوفك المعقودة فوق جسمى
ترسمى لى النيل على السرة جنينه
تقطفى الرمان
وتعملينى ازاى أقول اسمى
وازاى؟ أصون السفينه.
غنا
حلى ضافيرك، دى الشعور صفصافه
على سينا فارده، وماده لما ليافا
يافا بعيده
سينا لسه بعيده
الدم فتح ألف ورده جديده
والورد يدبل فى إيدين خطافه
حلى ضافيرك دى الشعور صفصافه
حلى شعورك، ده الندى جرحنى
كان فى الصباح. بيرق ويفتحنى
وصبح خناجر، نازله بتدبحنى
لما العروق، صبحت عيون خوافه
خلى ضافيرك، دى الشعور صفصافه
حلى ضافيرك، وافرديها مراكب
وف كل مركب ألف كف يحارب
يافا بعيده
سينا لسه بعيده
ولكل مينا بكره تجرى قوارب
طبل الحروب هيدق، وهيتعافى
حلى ضفايرك، دى الشعور صفصافه
ألوان
ارسمى لى النيل على السره جنينه
ارسمى لى النيل على السره
واطلقينى فى البلاد مهره
أرخى لجامى فى غيطان التاريخ
أعلا لحد الشمس، والأسوار
أصرخ فى وش خزاين الأسرار
أخبط بكفى ع البيبان، واصرخ
يترد ليه الصريخ
" يامين يقول لى سرك القتال؟
يامين يقول لى فى غيطان القمح
ازاى تجوع الرجال؟"
تتمد ايدك وشم ع السره
تتمد ايدى تلبسك عقد النهار
تنضم صوابعنا، يطلع ما بينها الصبح
والنوار
نكشف سر الورده، والصبار
نكشف سر المطر المحبوس فى الشتا والصيف
نكشف سر الجوع العريان م السيف
ترسمى لى النيل على السره جنينه
أرسم على أرض الوادى
ألوان الطيف.
غنا
يافا جناحين نصها حواديت
ونصها قمر
تاه مننا فى السكه الخطر
نخرج سوا ننده عليه، ونغنى غنوه للسفر:
بيسافر النيل فى الشجر
وتسافر الولادة فى المطر
وتسافر المداين الجديده، فى المداين القديمه،
فى الحجر
وتسافر الخيانه فى عيون المخبرين
وخناجر الغفر
وتسافر العيون المرعوبين
فى ستاير الصور
وتقفل الرموش سجونها ع النهار
وبطلقة الرصاصه
يرجع النهار، من السفر.
