البنت اللى بتشبه خدى
البنت اللى بتشبه خدى
يمكن .. ملامحها الغجرية
أو دقة خطوتها الساكتة
تأثير البيرة على خدودها
و البن المركون على روحها
خلونى استنى مقابلتها ..
يوميًّا من غير مواعيد .
...
أول مشهد
الصبح بيترجى السقعة تدِّيله براح
كوباية بتكشف أسرارها لكل الماشيين
ترابيزة بتعرج م الصدفة
هربان من كل اللى اعرفهم
متدراى فى حيطان القهوة
الركن السحرى المتخصص
فى مشاهدة عورات الدنيا
و بيستر كل اللى يعاهده يفضل ساكت .
و بدون تفكير.. أو حتى ما تهزمنى دوافع
بصيت ع الشارع ف لاقيتها
بتبوس الشمس بضحكتها
و تفوت قدامى و ما تبصِّش
لحظتها .. بلوزتها ما خطفتش عينيا
ولا إسود نقشة حنِّتها
و لاقيتها بترقص فلامنكو
و الوردة الحمرا فى ضفيرتها
...
نضارتى .. يا شاشات العرض المنسية
إزاى تتآمرى على سذاجتى
و تذيعى الفيلم المتقصقص
من غير مونتاج.
...
مشهد تانى
المطرة بتغسل ضحك بنات
فيضموا كفوفهم على روحهم
يمكن يسجنوا نهر الذكرى
بشمسية صبر.
تدخل ... فيبِلّ شروقها .. سراميك الصمت البهتان
المطرة على جسم الناس
بتخلى وشوشهم طبيعية
مليانة وجع/ أفراح مبتورة
و شويِّة مواعيد منسية
المطرة على جسمها هى
كما زيت دافى بريحة النعناع
بيلون بشرة زنجية .
القهوة أدفى من الشارع
و الشارع فاضى من الماشيين
صوتها بيسلم على ودنى
و الكرسى القاعد قدامى
بيطلّع خشبه و بيغظنى
- لو تسمح
- طبعا .. من فضلِك .. متشكر جدًّا
و بقية الديالوج الداير
محذوف بأوامر عربية
بتفرم فى طريقها شريط الصوت
و الفيلم الصامت فى نهايته ..
و بيخلص من غير تيترات.
...
سندريلا لو ف مرة استسلمت لليأس
ماكانِتش فضلت للأبد ..
صورة للنهايات السعيدة .
...
يا لسانى يا مَرسى العسلية
إزاى تتلجِّم قدمها
إعزمها على لحظة بريئة
ها تقضى أضعاف أضعافها .. و انت بتسأل
إحساس الكرسى فى إيديها
كان يشبه بوسة بطعم الغاز ؟
...
مشهد محذوف
- مش هاسأل أصلا عن إسمك
و ارجوكى كمان تعملى زيّ
سمِّينى مجازًا " الواد اللى بيضحك لما أعدِّى "
و انا ها افضل أناديكى تملِّى
بـ" البنت اللى بتشبه خدى بعد ما يتباس "
- أرجوك .. تسمحلى
- طبعًا .. من فضلك
متشكِّر جدًّا ع السهرة
متشكِّر على يوم المطرة .
- ميرسى على إنك خلِّتنى
حدوتة تحكيها لنفسك
ميرسى على إنك حسِّتنى
مع إنه .. كان فاصل بينا رصيف و قزاز
دلوقتى أنا لازم أهرب
باى باى علشان أقدر أرجع ..
بكرة من نفس السكة دى
من غير مواعيد
و تملى عينيك فاكرة ميعادى .
