العهد الأخير
عمرو شاهين
العهد الأخير
"من ديوان ( قبل ما أموت بساعات ) قريبا عند كل بتوع الترمس او فى مخزن قصر ثقافة "
لحظة ما يبان الوش التانى
م الجايز
تتكوّر كل شموسكم
و تموت الأرض .
ابعدوا
انا أسوء من اسوء كوابيسكم
ها اقتلكم
من غير ما تطرطش احلامكوا على مشاعرى
من غير ما يغيّر حبرى دموعكم
فتكتبونى رواية .
*
كل اللى اعرفهم ..دخلونى ..
زى دخول الشعرا قصر النعمان .
-الحيرة
مش اجمل مدن العالم
الحيرة
هى كل احلام الشعرا
وغرور العشاق
ماشافوش الحيرة الحقيقية
شافوا امانيهم ف نقوشها
شافوا رغباتهم جواريها
وانا قلبى الحيرة اللى ماليها
اضغاث الصحبة المنسية
و بواقى ضوافر خرابيشكم .-
*
كل اللى عرفونى ساعتها
دلوقتى ما يعرفونيش
اضحك فيبكوا للنحيب
ابكى فتبتسم السما من ضحكهم
كل اللى فاتوا ما سابوش اثر
كل اللى خرجوا فانحنوا
لسة الطواف جوايا داء اللى ماتوا مطرودين .
*
بعدها
يمكن يكون نفس الكتاب حاضن يمينى
- عودتنى امسك كل الكتب باليمين
كتابى وحده هو اللى ينفع امسكه بالإيد للى حابسه الوقت فوق حبل الوريد –
و انتوا ع الضفة التانية من القهوة
- القهاوى اللى بيلمح شباكها الشارع بطرف عينيه
ارحم كتير م القهاوى اللى دخانها بيغتصب الشارع –
بتحكوا عنى و تضحكوا
و انا بمسحكم من قلبى بسكينة ناعمة
انا اول سفاح فى الكون برتبة anti- virus
*
دلوقتى
لو جلدى اتشقق
احلامكوا ها تتسرب منى و تدبحكوا
علشان كدة
مش ناوى اموت بنى ادم .
