فاقد الشئ
يحي قدري
أيوه أنا
الأرستقراطي النبيل
اللي اتعود يأكل الحمام
م الدور التالت
ويتأكد
إن القطط شربت لبن
واتغطت
في برد ديسمبر ..
حافظ كل أرقام العربيات
ومواعيد خروجها
وامتى أصحابها
بيشدوا الستاير
وامتى بيتدفوا بشاي ولبن ..
هو ذاته دلوقت
بعد 20 سنه
البدوي البربري
اللي زارع على أطراف روحه
صبار مسموم
والقلب تراب
ما عمروش ندم
على زرعه خسعه
في أرض بور
ولا استنى سيل
عشان الخوخ يطرح صحاب ..
واقف على بعد
500 متر من إسرائيل
مش شايف من مصر
اللي اتعلمها في الكتب
غير عربية ناموس
بتعدي الفجر
وشوية كلاب ونس
هو اللي بيعرفهم
إن الليل جه
لما يقيد النور
وهما بيردو الجميل
ويصحوه وقت السحور ..
وجودهم مرتبط ببعض
وكل واحد فيهم
مش ها يتردد ثانيه
لو التاني غفل
عشان يبلعه ..
الصحرا علمتني
إن البعيد عن العين
أريح كتير للقلب
وإن فاقد الشئ
أحسن واحد يتكلم عنه
أمي .. صابونه بريحه
في كل شنطة سفر
أبويا .. حجاب غريب
بيلم التعابين ع القهوه
ويقطع سمهم
ويطلقهم تاني للشوارع عبره
إخواتي ..
طرح " الكلامانتينا " بدون مطر
أصحابي .. لبن رايب
الكتير منه يموع النفس ..
البدو الطيبين جدا
عرفوني
إن الناس زي الرمل
ترويهم
تغرز فيهم لحد الوحل
تنساهم
يطيروا في عنيك ما تشوف ..
وأكدوا
إن اللي يفرط في حبيبته
يتلعن قلبه
ويتحرم عليه ينطق اسمها
لحد الموت .
* الكلامانتينا : فاكهه ميكس بين الأناناس والبرتقال والشمام تزرع في رفح
على مية المطر
