علاقات حميمة
أمينة عبد الله
انت بطبيعتك شخص منفتح
بتقدر تعبر عن اشياءك بدقة متناهية
وبدون خوف من الصدامات المجتمعيه.
وبرجك متوافق تماما مع طبيعتك
وبيسمح لك
بشىء من التحايل ع الآخرين
وخلق كائنات تساعدك على حوار مفتوح بينك وبين نفسك
وهنا
مشكلتك الحقيقية مع نفسك
لانك خايف من فكرة التناقض
وان صورتك ما تتطبقش على بعضها
بس دى
مش ازمتك لوحدك
دى ازمة كل اللى بيفكروا ف ربنا بالشكل ده
ومحاولوش يوجدوا علاقة مش مربوطة
لا بخوف الديانات السماوية
ولا بحب الديانات الارضية
بين الحب والخوف
انت مطحون بعلاقات مش حميمة
كلها شبه العلاقة بين الطوق والاسورة
وكلها اشكال للهروب
من ضغوط ف دماغك لوحدك
لانك ما حاولتش تجرد الفكرة
وتربط بين ضغوطك وافكارك
وبين الضغوط والافكار العامة
فلبست الاسورة مكان الطوق
عامل لنفسك مجرة
وعالم فلكى ماسك فيه بنجم وحيد
لانك عارفه
خايف؟
انا عارفة انك خايف على عكس شجاعتك المفتعلة
وعارفة ان استسلامك لحضنى
وبكاك فى حضنى
هو معادلك الموضوعى للامان
لكنك
ح تفضل تدور ف مجرتك
خايف
وحيد
من غيركا ئناتى
