وكأننا مكتوب علينا الهم
ومتقدر
ومتسطر فوق الجبين
"مغلوب"
مغلوب على أمري
والعمر متكدر
واللي سرق عمري
في الأصل كان مكتوب
ويدوب التوب اللي مغطي
بيداري الدمع اللي ف خطي
علشان الصبح اللي ف شطي
مسحوب الرخصة ومشطوب
وندور في الساقية الدواره
ونتوه في الشارع والحاره
ممنوع
مع إنك مش جاهل
موعود بالدنيا ومطرود
وإن كان لك عقل أو فاضل
راح تنكر إنك موجود
وتنكد على نفسك أكتر
وتنكت وأنت المطرود
وتدور على روحك فيها
اكمنك صدقت عينيها
اكمنك عارف وبتفهم
اكمنك كنت المقصود
والقصد في وضعك تستنى
وإن ركبك همك تتهنى
ده الحلم المتبعتر فيها
راح يدبل منك ويموت
ده الجبر أساسي في اللعبة
واللعبة بورصة للصوت
والصوت أخر ما تملك
يا تدافع عنه وتضحي
يا تبيعه بقرش وتموت
■ ■ ■
اليأس شعور اللاجدوى
سحب تتجمع
تتكاثف فوق العقل
أغلال تقبض
تهرس كوسائل نقل
طرق مسدودة
لا ضوء فيها
لا زرع فيها
لا ماء فيها
لا حقل
سجن لا مخرج منه
إلا بالمنطق والعقل
■ ■ ■
والعقل من فعل المادة
مضروب على عينه ومصلوب
على أول ناصية من الشارع
لأجل ما يتحدف بالطوب
والطوب مع أول حدفة
بينفذ كل المطلوب
م الصوت الواطي والعالي
والواصل بينهم مندوب
مندوب الثروة وحساباتها
وبواقي القصعة القلابه
مندوب الحنجل والمنجل
ووشوش السلطة الكدابه
والرب يبارك ويساعد
الخوف الوارد والصاعد
من ملح الأرض وأنفاسها
فالملح أساساً مغصوب
■ ■ ■
الرب شرطي أحمق
يبحث عن نزوة في رغيفك
وزجاجة فودكا من دمك
مسحوب منها تعريفك
ممسوح منها توصيفك
وتوظيفك أمر لابد منه
حتى يبتزك ويسوسك
ويزيد الأمر بتخويفك
بفوائد الدَّين وأنواعه
بدوائر الدِين وأتباعه
والناتج عن هذا كله
مسخ مصنوع ببراعه
والخدعة تكمن في الطاعه
■ ■ ■
ومشيت في الطاعه على دمك
مع إنك
مش ممكن تمشي
أو حتى تعدي وتفوت
وازاي هاتفوت ؟!
والقلب الساكن في ضلوعك
من كتر دموعك بيموت
والروح عماله تروح منك
اكمنك عايش وف همك
مدبوح وبترقص ع السلم
لأجل ما تتعشى وتعيش
والعيشة مفيش
حتى الأحلام المروية
بسنين العمر ومسقية
زهقت م الصبر وأشكاله
طفشت من عيشة التهميش
ومتسألنيش
إزاي هاتغير أوضاعك
وجناحك منتوف الريش ؟!
وإزاي هاتعيش؟!
والعيشة مفيش
■ ■ ■
أن تشعر أنك مُغترِب
والحزن وراثياٌ فيك
للمرة الآلف ومُكتسَب
والحلم مليك مطرود
ساقوه لنار الأخدود
رموه في بطن الوادي
والوادي نبض غضبان
يغمره موج الأشجان
تهنئة حارة وقلبية
من طعنة خنجر خلفية
لازلت طريد الأحزان
لازلت سجين الحرمان
لازلت أسيراً في همك
فلتنسى أنك إنسان
أو أنك كنت إنسان
أو معنى كلمة إنسان
مادمت تحارب في ظلك
مادمت تقاتل في الريش
مادمت جالس بل ساكن
تنتظر المنحة والعيش
وتفضل صمتك وسكوتك
وسقوطك في بئر يبور
مادمت تأبى الحرية
والحر يأبى ويثور
■ ■ ■
8/1/2012
