يا عم والله العظيم الحكاية خلصت
البيت ولا حتى البيوت دي مش هاتدخلها تاني
الشوارع دي اتغيرت خااااااالص
ثم انت ماعندكش وقت تروحها كمان
الناس دي كبروا وعجزوا وكتير منهم ماتوا
وانت نفسك كبرت
والله كبرت ييجي عشرين سنة ع الأقل
الريحة القديمة اللي بتنط في حتة مش معروفة من روحك
ماعدتش موجودة غير في الحتة دي
لا فيه دقن الباشا
ولا فيه عيش بلدي معمول في فرن مسحور
ولا فيه تراب ناعم مخلوط بمية العصرية في الشارع
خلاص يا عم باقولك الحكاية نفسها خلصت
البنت كبرت ... كبرت قوي
وتلاقيها كمان متجوزة وعندها تلات اربع عيال
والحكاية في خيالك وبس
واخوك الصغير فتح بيت وشعره وقع ومابيلحقش يقعد في بيته
والدنيا بقت زحمة قوي ده حتى مافيش ولا حتة هادية تقدر تقعد فيها
لوحدك زي زمان
والجو بقى غبار ... غبار كتير قوي
يااااااااااااه كل الغبار ده جه منين
هو كان مستخبي في حتة في السما طول السنين اللي فاتت دي؟
وعمال يزيد يزيد
أقولك ... ده حتى راحة البال اللي كان ممكن تزورك مرة ولا مرتين في الأسبوع كدة
ماعدتش بتخطر على بالك حتى
والحواديت ... خلصت هي رخرة
تصدق !!!!
مابقاش فيه حواديت
حتى تلاقيك نسيت الحواديت اللي اتقالت لك زمان
وتلاقيك مكسوف تقول قدام بنتك قرش ولا ربع جنيه حتى
مابقاش خلاص
والنهار مابيلحقش يطلع الا وييجي في ديله المغرب والليل على طول
ولا حد بقى بينده عليك من تحت شباك بيتكم
ألا هو ده بيتكم؟
ما علينا
ويجيلك ناس فجأة كدة زي زمان
ده حتى اصحابك القدام يا جدع غيروا بيوتهم ودهنوها
وكأنهم بيمسحوها من ذاكرتك
طب تقدر تقول لي يومك بيفوت ازاي؟
ومع مين؟
يا بويااااااااااااااا
الناس اللي انت (مفروض) تعيش معاهم وتقضي أطول وقت في صحبتهم
مابتشوفهمش بالشهور
يا راجل ... دانت حتى ساعات بتكسل تكلمهم في التليفون
والناس اللي انت عارف انهم في لحظة (لحظة معروفة على فكرة وحصلت ياما قبل كدة)
مش هاتسمع صوت حد منهم لمجرد ان وقت المصلحة انتهى
في شغل بقى في صحوبية
في صداقة صورية في حالة عاطفية مشوهة ولا ع الأقل مهزوزة
تقدر كدة تقول انا رايح الحتة الفلانية فجأة ؟
ولا انا هاطب على فلان
يا نهار اسوح
هاتفكر مليون مرة ، ع الأقل هاتقول لنفسك
تلاقيه هايقول ايه اللي جابه فجأة؟
مافيش موبايل؟
ثم انا لسة قافل معاه الشات ع الفيس؟
تعرف تخلع نفسك كدة من بين أنياب الحياة اليومية
وتنعزل عن العالم
لمجرد انك خدت القرار ده؟
طب اقولك .. لأ أتحداك ... تقدر تقفل الموبايل 24 ساعة بس؟
طب بص
أهو كل ده حصل وخلاص
وانت يا حبيبي مش هاتقدر تغيره
لا هاترجع ابوك وامك للحياة
ولا هاتقدر تروح تعيش في اليلد مع صاحب عمرك
ولا البنت اللي كانت... هاتقدر تعيد معاها القصة م الأول
ولا هاتقدر تصغر 20 سنة وتتنطط من اتوبيس لأتوبيس
وتجري بين العربيات وانت بتعدي الشارع
ولا هاتقدر تاخد قرار مفاجئ بالسفر لأي مدينة لمجرد انك عايز كدة
ولا انت اله ولا سوبر هيرو ولا معاك التايم ماشين
بس عارف
انت زي ماعشت اللي فات
لازم تعيش اللي جاي
واوعى تكرر غلطاتك
انت كبرت ونضجت وماينفعش تعيش بسذاجة ولا رومانسية العشرينات من العمر
عشان كدة قرر توقف التفكير في اللي (راح)
وقول لي بقى
ناوي تعيش العشرين سنة اللي جاية ازاي؟
