(1) الاخذ
بناخد كل احلامنا
على الممكن
و فى السكة
تضيع احلام
او ربما بتوصل
ممكنات تانية
لناس تانية
و احلامهم
بتوصل شط ممكننا
فنتعرف على روحنا
بشكل جديد
و نتعايش مع جروحنا
و احيانا .. نسيبها تزيد
وناخد بالنا من بكرة
و ناخد م الصور ضحكة
و ناخد م الصحاب افكار
و ناخد م الحبيب رقة
و ناخد م العدو ضربة
و ناخد م الفراق ... ولاشيئ
فــــــــــــــــــــفـــــــــــــــــــــد
_____________________________
(2) الفـــــــــــقـــــــــــــد
ماتصدقوش ان الفراق
آخر فصول المسرحة
ماتصدقوش ان الحكاية هاتنتهى
لو نبتسم و نقول سلام
الفقد ... حالة من الوجود
فماتحتاروش
و ماتوصفوش بكرة بأنه بعيد اوى
بكرة الل جاى
هايسجل المفقود ف خانة التعويضات
و هايرمى للمحبوبة زفة و دبلتين
فيعوض الـ.........ـ
فمايعوضش حاجة
و مايعوضش حد
للمفقودين ... المرتاحين
بيكون تملى الاشــــــــــــــتيــــــــــــــــــــــــــــــــاق
______________________________________
(3) الاشــــــــــــــــــــتيـــــــــــــــــــــــاق
عامل مساعد ع اللقا
عامل .. كأنه برئ اوى
مع انه فى الغالب اوى
بيكون اساس التجربة
بيعلم القاسى يكون ارحم على الغايبين
او بعد حين
بيعود المشتاق يعوض نفسه بالممكن
بالاختصار الاشتياق بيكمل الدايرة و تفضل
............... لا نـــــــــــــــــــــــهــــــــــــــــاية
