أنا مش عارف
انا قلب وروح
جوايا جروح
مش عاوزه تروح
بقالها سنين
انا عين ودموع
وحنين مزروع
وشجر مقلوع
من قلب الطين
انا حبة شوق
علي وجد وذوق
توهان ما يفوق
رايح علي فين؟
انا بسمة صيف
و جايلكو ضيف
عجل يا خريف
ربيعنا مخيف
و شتانا حزين
انا ضحكه متعقده
جوا الورود المقطوعة
انا نغمة متشعلقة
في حبال كمانجة موجوعة
انا توب ومترقع
بحتت فاضية
انا لون ومتبقع
ببقع قاضية
انا حلم كل ما بصحي
باستعيذ مني
انا شفت نفسي سعيد
لأ ومتهني
انا حبة حروف ع السطر مرمية
انا العطشان اللي ماشي يبيع مية
قلبي بطل يدق خلاص
وبقيت بدق برجليه
انا اللي مستني تنادوا
واعمل مسمعتكوش
و الدنيا تفتح دراعها
اعدي ومحضنوش
والشمس تبعت شعاعها
كأني مشفتهوش
و الضلمة تنورلي شمعة
أخبط في كل الوشوش
تجروا خوف من جنوني
أنادي متخافوش
انا اللي نور عيني ... حرية
و النبض فيا سلام
انا اللي ضحكتي ع النجوم مرمية
وكل أنفاسي غرام
انا اللي تحت البحر ساكن
و عالشجر عصفور
انا اللي من يوم ما اتولدت
عمال اهد في سور
وكل ما حجر ينهد
ينبت مكانه صخور
انا ليلة كدا .. فيها الصفا
كف الحبيب في كفي
و الحزن كله اختفي
ورغم التلج اللي مغطيني
حاسس في قلبي بدفا
أنا حبة موج ع الشط اتحدفوا
حالفين ياخدوه بالأحضان
و عشان من جوا قلوبهم صدقوا
داب لهم الصخر شوق وحنان
انا عيل تايه م الجنة
وماشي يلف عليها يدور
وشطاني كمان بيتوهني
بس انا قلبي مليان نور
بياخد يدي لجل ما اعدي
وارجع تاني بين الحور
انا حبة ارقام تقراها
تقول دا تاريخ
شلت نجوم السما كلها
ومكانها حطيت نفافيخ
فرقعوا واحده وراها التانية
وأنا عيل
فمليت كل الدنيا صريخ
حواليا الدنيا ورود ولكنها متحجره
انا تاكسي العمر دايما واخدني لوره
مرايات معكوسه ومقلوبه ... ومتكسرة
انا همجي و بدائي و فله .... أنا مسخرة
أنا همس الليل
وغني المواويل
أوجاع النيل
تحكيلك عني
أنا بكره وبعدو
حبيبين اتواعدوا
علي نبض قلوبهم
أنا برهن ظني
أنا طعم النهار
ولفحت الشمس القوية
جوايا شوق وانتظار
و الهمة زي ما هيه
انا الحبل اللي شنق نفْسه
وانا السكين اللي قطع نفَسه
جرب مليون انتحار واكتر
ملقاش فيهم حاجه تناسبه
نفض عنه التراب وقام زعق
نادي ع الكون ... مين هنا ينافسه
انا اليائس في عصر جنون
انا البائس انا المجنون
انا اللي ياما قتلت نفسي
ولسه رغم الذهول ... مسجون
أنا
ألف ونون وألف
مرة بهمزه
ومرة مختلف
انا
كأنها مرايه
و انا النقطه
عايش ف النص
في قلبي ألف ضحكايه
وقلبي
علقوه ع الرف
ناس قالوا دا ماشي يدور
علي نصه التاني
و أنا أصلا لسه مش لاقي
بقيت الأولاني
أنا كنت مقطوعه في غنوة
بطلت الناس تسمعها
وصداها مسافر في الأكوان
و لا عاد فيه قلب يساعها
وبيتين شعر في قلب قصيدة
محدش عارف مين ألفها
أنا دم بينزف لضحية
ع الأسفلت .... يا مين يسعفها
أنا كلمة سري نسيتها
وكمان اليوزر نايم
طب حتي انا فين خبيتها
يااااه .... دي حكايه بقالها سنين
أنا قصه نهايتها بخير
من غير خاتمه
وفصل أخير
أنا صفحه رقم كام مش عارف
أنا صرخه فرحان و خايف
أنا
أنا مش عارف
