ايوة بتوحشيني ، !
يعني مش باين عليا ؟!
يعني مش فاضحاني عيني ؟!
يعني صوتي لما أقطع ولا أتهته ،
ولا لما يتوه مني الكلام
كل مرة تيجي سيرتك ،
لما انسى كيف كان السلام ،
واكتفي بهزة دماغ ، او بابتسام
لاحسن تغيري م البنات وتعمليلي 100 حكاية والسلام ،
طب لما بطلبك ؟؟؟
بذمتك ،
صوتي مش بيبان عليه الاشتياق ؟
أو اني دايب من الفراق ؟!
طب إلغي عقلك واسمعيني ،
قلبك يقولك ع الحقيقة ، انك أكيد بتوحشيني ! ،
لما أعزفك مقطوعة حلوة .
لما ألغي كل شِعري ،وأكتبه من تاني عنك ،
وأوصفك في كل كلمة
و أوصفك لكل غنوة !
وأرسمك في كل نجمة شافها قلبي ف السما
وأغزلك نجوم تدور على جيد السحاب ..
طب قلبي اللي داب ،
من سهرة وعذابه في دنيتك ،
راسم طريقه لسكتك ،
حالف يكونلك مهما كان طول الزمان !
ولسه جايه بتسأليني،، ان كنتي يعني بتوحشيني ؟؟!
ايوة بتوحشيني ، ..
يعني مش باين عليا ؟!
يعني مش فاضحاني عيني ؟!
.،
وليد الاسيوطي ـ،
