"مصر يامّه يا سفينة"
إمتى تِهدي وترسي بينا
شوفي حتّى أي مينا
جرّشيلِك لو يومين
مصر يا مّه يا مُعسكر
العساكر فيه بتسكَر
دم متعكّر مسكّر
باتوا فيكي مُذنبين
مصر يامّه يا قضيّة
فيها أنا المجني عليّا
شهدوا زور جمعاً عليّا
والقضاه قالوم آمين
مصر يامّه بدون ما أبالِغ
صَكّ حُبِّك صار لُه دامِغ
أراجوزات واخدين مبالِغ
ع الشاشات مترصصين
مصر يامّه يا تكيّة
شِلّة رايحة وشِلّة جايّة
لجل مُلكِك ليها خِيّة
ناصبة لينا 100 كمين
مصر يامّه يا قطيع
فيكي بيسير الجميع
إللي فيكي من صنيع
مَن باعوكي مِن سنين
مصر يامّه يا موالِد
حُبّي ليكي فيكي والِد
كام "عماد" .. "مينا" و "خالد"
أولياء مِ الصالحين
شوفنا ليهُم كام كرامة
ثورة على روحهُم علامة
لجل ما ننول الكرامة
إحنا لسّه مكمّلين
مصر يامّه رايحة فين ؟!
