تعرف يا أسمك ايه
أنا كان زمانى بيه
بسجار مالشرب يكون دايب
بس الحظ رمانى هنا
بعد محولاتى الممكنة
مفضليش غير كارت الشايب
والزمن أبو طبع لئيم
ما صدق انى خسرت الجيم
حكم علية بالتوهات
تعرف ..
من صغرى كنت جبان
بخاف حتى رمى الزهر
وورق الضُمنة لو كتير
ولعب البندة فـ كورة بلاك
وبخاف لما يموتلى وزير
وبحس بخنقة وحبة كبت
مع آخر سحبة لآخر كارت
عاشق يبقى لآخر دور
تعرف ان أنا لما خسرت
اتعلمت ان الحظ
يشبه للكلب المسعور
بيشم الخوف
والأدرنالين
قادر يشوف
شغف العين
بعد ما تكسب أول لعبة
يفضل جمبك لما تعوز
يسقيك دايما طعم الفوز
لحد ما توصل آخر الكدبة
وتصدق انك كسبان
فـ تقوم عشمان
وترهن كل الفيش وياك
فـ يقوم سيبك
تلعب وحدك
فـ تقوم خسران
كل اللى معاك
وبعد الجمع وبعد الطرح
وشيل الحزن من وقت الفرح
تعرف انك ..
مخسرتش بس فلوس
خسرت بطيشك
برضه نفوس
كت بتحبك
وباقية عليك
من غير ما تعوز منك حاجة
فا تصير وحدك
مبقتش فى حاجة تاثر فيك
ولا انتة بقيت باقى لحاجة
فـ تعيش زيى
وتكمل عمرك بتشجع ..
النوم فى البار
والموت بهزار
واللعب لحد أما تصدع
أو حتى لحد اما تفلس
أيهما الأقرب للأحداث
أنا آسف جدا لو كترت
انا شكلى سكرت
كنت أنا فاكر ان انا هرتاح
لما أتكلم مع حد
غير حظى وغير كرت الآس
أنا داخل أنام
ماللعب زهقت
أقولك ..
هفوق لو نمت
اعصر تانى سفنجة فـ كاس
