و اللهِ ما حاعرف أعملِّك حاجه
ــــــــــــــــــــــــــــــــــــــــــــ
عيطي ..
و اللهِ ما حاعرف أعملِّك حاجه
كل اللي حيحصل ..
إن عياطِك حيعوّر روحي و بس
و انا روحي مخيطها امبارح أربع مرات
المره الأولى
بسبب البنت اللي اتعترت فِيَّا بمحض الصدفه
حبيتها قوي ..
و بمحض الصدفه ..
شُفتها عماله بتتعتر امبارح ف الشُعرا بحالهم
و لقيتني نشاز
شُفتي .. ؟
الولد اللي بيعشق كل كمنجات الدنيا .. نشاز !
و المره التانيه
ساعة ما عنيكي بقت بتمطر قدامي
و انا مش قادر احول قلبي لمنديل
و لا قادر اطبطب حتى عليكِ و اقولك معلش
و مش قادر برضو ..
أَرَجَع ابويا من التُربه
و لا اخَبط على باب المدفن
و أقول لُه تعالى معايا عشان " مريم " بتعيط
مش عارف يا امه ..
ليه بتعامليني ساعات على إني ( مسيح )
و المره التالته
و انا شايف كل الغلطات اللي عملتها ف الدنيا
بتتمشى مشاهد سينما على الحيطه
و بتبُص لي و بتستحلف لي بأيام جايّه ..
ف لون جلابيتِك ..
اللي حلفتي ما تتغيرشي بعد أبويا ما مات
عارفه يا " مريم "
التفاصيل كلها تقريبا لون جلابيتك
و التعويره الرابعه
قصدي المره الرابعه اللي انا خيطت الروح بسببها ..
بتاعتي
مش حاقدر اقولهالك
و لا اقولها لمخلوق ع الأرض
الدنيا حقيقي بقت برد
غطيني و روحي هناااااااك
أبعد
عيطي مع نفسك
مع ابويا اللي بيحضر قدامك فورا ..
من غير ما تعَزّمي ع الروح
بس بلاش ويايا
و اللهِ ما حاقدر أعملِّك حاجه
أنا أصلا ع الأرض مجرد ضِل
