كنت بحلم ..!! | سعيد شكري

كنت بحلم ..!!

كنت بحلم ... أيوا بحلم
بس كان الحلم .. ساحر
كنت ... خير والله اعلم
كنت زى الطير مسافر ..!!

هب ريح الشوق اخدنى
من بلاد العشق زادنى
ألف ضحكة بتشاغلنى
وألف نظرة بتراودنى ..!!

وانتى واقفة ياحبيبتى
احلى واحدة زى مانتى
احلى ماشافت عيونى
قلبى داب لما انتبهتى ..؟!!

كنت بندهلك تشوفى
قلب عاش العشق صوفى
قلب زاهد كل حاجة
إلا إيدك بين كفوفى ..!!

فجأة هبت ريح عفية
بعترت كل اللى فيا
بعترتنى مابين جراحى
قمت صاحى وانتى جاية ..!!

حلم يمكن كان دقيقة
زى احلامنا البريئة
حلم ماستحملش لحظة
ف قلب هربان م الحقيقة ..!!

إعلان