ارجوك ما تفهمنيش بسرعه
تفتح البتارين ف قلبى
و تمسك السلعه الوحيده اللي فيه
وتبص بعنيك ع المشاع
انا قلبى يمكن زرعه خضره
فما تشربوش نعناع ف شاي
ارجوك ما تفهمنيش قوى
علشان بصارحك بان انا زيك بفكر
و ما تمنعش عينى م البكا
علشان تعبر
انا قلبى يمكن حته بيضا لكنها
مش مفرش الفازة
و لا انتيكه من ضمن الدولاب
ارجوك
ما تفهمنيش اساسا
انا كل حته ف نور عنيا فرشتهالك
امنيات
اسف عشان طولت عليك انا ف الكلام
طب مد ايدك بالسلام
كمان حتمشي تسيبنى انا من غير سلام
طيب خلاص
اللي انت عاوزة
بس و انت ماشي من هنا
خد معاك
كل الحاجات اللي حلمتك يوم عشانها و قولها
ده حد مات
