زى النهارده دفعنا تمن الوحده
على صون كرامة شعب كان جبار
زى النهارده عملنا رجاله
قلنا القناه حقنا عدونا ثار
النكسه كانت وسام على صدورنا
و حلفنا لازم يوم هناخد التار
حلل الولايا كانت دروع صلبه
كان لسه فينا مثل بتتربى
عزفنا على وتر التاريخ غنوه
لسه الزمن بيحب يسمعها
لسه الجينات فى ولادنا عاشقاها
طرحت فى ثوره و ثورة فى ضحاها
بتدى درس و عبره لﻷحرار
مات فينا ليه الحلم و إتكسر
بعد الميدان ما بدأ يجمعنا
و يصحى فينا جينات عبور فسر
للدنيا شعب بيبنى و يدمر
و يفيض فى غضبه زى نيلنا زمان
إمتى هنرجع تانى زى زمان
رجاله نقدر نرفع الرايه
نرفض معونه و نبنى فى حكايه
أولها ورد طرح فى معتقلات
يا ولاة أمورنا إتعلموا لغانا
يمكن ودانكوا تحن لغنانا
مش معنى رفضى عماله و خيانه
و لا كل مؤمن فى قلبه إرهابى
الحلم لسه بيبكى على بابى
تعب من الوقفه قعد يرتاح
أنا شعرى شاب و أنا لسه مافرحتش
و فى البطاقه قالولى لسه شباب
مدوا اﻹيدين خدوا منى طاقة نور
مش غاوى رفض ولا عشقت أثور
نفسى الولد لو جانى أعزفله
غنوة وطن ما نسيش شباب محتار
ما كفرش يوم ما على القوانين ثار
و لا مات بلاش و لا أمه محروقه
و دموعها لسه بتجرى ليل و نهار
