من المشروع الجديد
( حلم مهمش سالم )
---------------------
1- نوستالوجيا
* * * * *
ستى . اللى الروماتيزم هدّها / و انا ابن خمس سنين / ربطانى ف حبل من وسطى / آخره باب الشارع / عشان ما أطلعش بره / و تدّور عليا . . و هى مش قادره تتحرك اصلا / و انا من صغرى . مش بحب الالعاب البايته / ولا الحاجات المسلوقه / / مشغول دايما باللى بره الباب / و ف مره م المرات / . . فكيت الحبل / و طلعت بره الباب / مشيت بعيد بعيد/ عشان ما حدش يدوّر عليا /و لعبت مع عيال ما اعرفهمش / و اتخانقت مع ناس مش شبهى / و لما تعبت . . نمت ف مكانى / صحيت لقتنى ف حجر جدتى /و رجلى متجبسه / و ف قورتى فوطه مبلوله / و من كتر الوجع / برد على غٌنا ستى بالآهات / و خدى مبلول من دموعها / و صوابع ايدى . . ماسكه طرف جلابيتها / عشان ما تهربش منى تانى / لو عاوز أرجع
