عماد عامر
القصيده الحمرا
========
مفتتح
-----
مكتوب على بابي
يارب . . صون الندى
من هجمة الفراشات
كل الصحاب اتجمعوا بتارين
و القلب معروضلك
كل الحاجات اللي ابتدت بالضحك
ماتت على الشفه
كل الحاجات اللي ابتدت بعياط
عاشت ولا الذكرى
------------------
الحصه الاولى( تاريخ )
كل الثورات المكتوبه
مافيهاش حاجه تضحك
- طب انت بتضحك ليه
- عشان بقراه بالمقلوب المعدول
عادى مش فارقه
تراك
القلم ده حيفهمك ازاى تقرا تاريخك
يا ميس يا ميس
الحقى وشه بيجيب دم
هامش 1
بمشي ف شوارعك م الالف للياء
و كأنى عاشق
رافض الترياق
مجنون بحب مافيهش اي امال
و لاحتى عارف معنى للترحال
------------------
الحصه التانيه ( احياء )
درس التكاثر
اللي بيحمر خدود البنات زمان
بقا
زي الماتشات المتعاده
عارف نتيجته
كلمنى عن الديناصورات المنقرضه
تعرف
ان اغلبيتها
كانت ما بتاكلش لحم؟
يا راجل
امال مين اللي عاش
اسال الضباع تقولك
هامش 2
الساقيه لفت ع الرقاب و النخل
و الحاله مش عجز السؤال للحل
موجوع كلامك حتى من غير صوت
و الصوت بيشبه للاسى و الذل
--------------------------
الحصه التالته ( العاب)
يا ولاد
اللي مش حييجي بكره
بفانلة ابو تريكه
مش حيعتب ارض الملعب
يا استاذ
انا اسماعيلاوى
ولااا
روح لم الورق م الحوش
حاااضر
فسحه
عمال بطلع روحى من الخنقه
احلم بحاجه زمان بتعجبنى
ساندويتشات الامل
ما بقتش تستر
لحم حلم جعان
انساكى القى المركبه راشقه
و الشط اطول
من دموع العين
الحصه الرابعه ( - - - - - )
كون الاستاذ غايب
ما يسمحلكش
انك بالموس اللي بتبري قلمك بيه
تعور بيه زميلتك
حاضر يا ابله
ابوك بيشتغل ايه؟
ما اعرفش
ليه؟
اصله ما بيجيش
هامش 3
انا كانلى طاقه بس كانت نور
و النور بيجرى من بحور لبحور
دلوقت خايف
اندهلك مالقاش
غير صوت و عاجز ينحني م السور
الحصه الخامسه ( دين )
(و اعدوا لهم ما استطعتم . . )
يعنى ممكن
سيف
مطوة
قزازة مولوتوف
قنبله كيماويه
. . .
استاذ
- ايه يا لمض؟
ينفع نعدلهم عقلنا؟
- طول ما اشكالك موجوده
مش حيقوم لنا قومه
قوم . . اخرج بره
حاضر
هامش 4
شايب عشان الشيب لا غيب و لا عيب
السيب ده مظهر حب مظهر طيب
ميت عشان الموت نهايته حياه
و انا كنت نازل دنيتي بنحيب
--------------
اخر حصه ( رياده )
و بكده يا ولاد
نكتشف ان مصر
رائده العالم
في استيراد
الالعاب الناريه
و المخدرات
و الموبايلات
و دى مميزات
مش موجوده ف دوله واحده غير عندنا
هو عم على ما ضربش الجرس لسه؟؟
--------------------------
نهايه
يارب
كل الحاجات مكتوبلها نهايه
و الحزن جوه الوطن
نهاياته مفتوحه
يا معكرين السكه بالشاشات
و مضلمين الفرح
وقت الخروج منها
حبقى . .
زي اللي عدا حاجات
ولا كانت الحاجات لازم تعديها
