محمد الحمامي
+18
ودقوا الطبول
وأحزن يا ناي
مواطن
مناضل بينعي إللي حي
وميت مكسح
وأجنب تفسح
وتفضل تسنح لبكرة إللي جاي
شهادة إبادة لأوضه الخزين
وفرشة نقاشة لوش الحزين
وحبة حرنكش
يحلو المعكر في عين الجنين
وسادة لسادة في عهد الطغاة
و100 ألف طعنة بتوهب حياة
وضحكة وشنطة
وجزمة بكعوب
وسكر شفايفك جماله يدوب
ولحظة غروب
وقلبي بيهتف "غاوي الهروب"
في لحظة فضول
فتحت كفي يكونلك براح
وجنبي المهدم يكونلك جناح
نهارك مليل بدون الصباح
وسمنة كلامك
بتدي في تمامك
نحي عمامك بعلو الصياح
وشاشة بترقص بإسم النظام
مولانا سلامته
مطلع ........
وناوي يطرطر ويملي الزمام
وشعر مشعر في عين العيال
وكسوة ونسوة تقدر بمال
وزفرة في ميت
هتفضل تبيت
وتدعي لبكرة يطير الحمام
