عماد عامر
العربيه اللى ما جاتش
==============
زمان
كنت بشوف احلامي
مهمه
او
جديرة بالتنفيذ
مثلا . .
انى اكون
اهم حد ف الدنيا
و اني اكون مهندس
و دكتور
و ظابط شرطة
و بحار
و كنت بكرة مهنة التدريس
و بقيت مدرس
و كنت بحلم
ببيت مليان اولاد
و عربيه و فيلا
و الحمد لله
ساكن ف شقه
اهم حلم
عاوز اتكلم عليه
هو العربيه
ما اعرفش ليه
كل الاحلام
كانت مرتبطه بيها
و كنوع من الوفاء للاحلام دي
اتمسكت بحلم العربيه
صحيح العربيه ما جاتش
لكن الرحله المنهكه و الممتعه
علمتني ان الاحلام مش بالكترة
و لا بالقله الاحلام لازم تتغذى على الاحلام
علشان تعيش و ما تدخلش ف كهف الاماني
و تموت زي العربيه بتاعتي
ما ماتت
على باب الحلم
