زمان الوصل
نادية مدني
زمان الوصل
"جادكَ الغيثُ إذا الغيثُ هَما"
لك سلامي
ياللي باوصف فيك هيامي
ياللي مالي.. كُل مالي
طالما
عايشين أنا وانت تحت نفس السما
"جادك الغيث إذا الغيث هما"
لو السما تمطّر في يوم
والخير يطولك
يبقى راق لي الجو
لو النسيم صبّح عليك
وجمّل يومك
يبقى يومي احلو
ياللي أروع شيء في دنيايا اني اشوفُه
ياللي أبدع شيء في عيني جمال حروفُه
"جادك الغيث إذا الغيث هما"
جود بوصلك
عارفة إن أوقاتي الجميلة في انتظاري
لما اقابلك
لسّه رغم البعد شايفة الدنيا أحلى
وانت فيها
لا فيها بَعدك.. ولا فيها قَبلك
"جادك الغيث إذا الغيث هما"
زمن الوصل اللي باتمناه طويل
حلم التلاقي اللي ما بيننا
يلغي فوق الألف ميل
ولحدّ يومها
لو قدرت ابعت سلامي
لو قدرت أقول ويشرح لك كلامي
لو قدرت أوصّي غيمة خير تضلل فوق جبينك
لو عرفت أخلّي طير الشوق يعرّف قلبي فينك
تبقى هانت
واللي باقي مش كتير
طول ما بنعيش تحت نفس السما
"جادك الغيث إذا الغيث هما"
