لخبطة
هشام صبح
(متلازمة التمد،السجاير،وكافتيريا بالاس)
الباب بيخبط
تتقلب فى السرير
من غير ماتفتح عينيك
يصدمك النور اللى جى من الشباك
اللى نسيته امبارح مفتوح
لجل ماتدخل نسمة هوا
تطرد الحر
وريحة الدخان
ايدك بتدور لوحدها على علبة السجاير
اللى كانت جنبك طول الليل
ع المخدة
تمسكها
تهزها
نسيت انها كانت آخر سيجارة
اللى شربتهاالساعة٢بالليل
وانت مستنى حد يفتحلك حضنه
تونس حيرتك بيه
حتى لو بكلام
الباب بيخبط تانى
تفتح عينك وتصرخ:
-أنا مش موجووووووووووود
تفتح فيس بوكك وتلاقى أخوك
عمال بيهدد سلفيين
كانو نايمين
من بعد ماصلو الفجر
نفس الأخبار
وآدى دعوة جديدة كمان
يالا ننزل ع الميدان
-''هى فين علبة التونة اللى فتحتها امبارح
ومكلتهاش''
العيش ناشف
والبويلر محتاج تنضيف
بس مفيش
غير هى كوباية واحدة
يمكن من شهر صاحبها
مغسلهاش..
الجو حر
والحموضة هتقتلك
حتى شريط الرانيتيدين ماعادش كافى
عشان تعيش
زى التانيين..
سكوت حواليك
زى الموت
مبيكسروش غير صوت النخلة الدبلانة
لما بتتنشق على على حبة مياه
يمكن ترد بيهاليها الروح
فين السجاير؟
مش قلنا خلصت؟
والا انت نسيييييت؟
الشمس بتلسع فى السكة
وانت تايه
لسه بتدورلك على حد ونيس
أحمد نايم
عيد فى نخل
حتى الدكان كمان
مقفول
تتفرج ع الطريق
والعربيات هنا مبيقفوش
خوف م البدو؟
والا يمكن مشتاقين يهربو م الموت؟
هانت
كلها ليلتين
وبكره يقفو عشان ينتشلوك
على أىىىى مكان
تفتح فيسبوكك تكتب نوت
ويجيلك الرد
الوقت طال
تعذر الاتصال
