تصبح..انسان
أحمد أسامة
تصبح..انسان
متروس احلام
محبوس احكام
ولغاية كام؟
مسموح للحاصل
يعلى بصوته على المفروض!!ء
ولغاية كام؟
مرفوض تلميحك بالفكرة
ابعد من فتارين المعروض!!ء
فـ النوم مرصود..قبل الصحيان
لو ليل الشارع صبحه ميدان
بايت عاقل قايم غضبان
ملبوس بالجان والنار والدم
مفروش الغام بتداوي الهم
وبدال مايفرق سكك الخلق..
اهو صاحي يطبطب..صاحي يلم
وعشان ما الستر فـ عتمة تضم
الفجر بيقرص قلب الام..
على العفاريت
فتعاتب روحها على الحواديت
اللي حكيتها لجل يناموا
على سيرة الديب هيقسم تركة
ودول قاموا
عملوا مناورة..
قلبت ثورة قلبها بركان
الواد العاقل بيفكر
للواد الفاقد فيفجر ..جواك انسان
والبنت السكر بتعكر صفو السجان
علشان تتعايق حرية
وتضايق افكار منسية فـ لحظة فوقان
ملهاش تفسير
وتفاتح قلبك ف التغيير
فتغيير من جرأة ملامحها
وتطير لطموحك بجناحها
لكن مش قادر تسامحها
انها قالت
وانت اللي فضلت سنين ساكت
ع اللي فـ نفسك..رغم التوهان
متروس احلام
محبوس احكام
مع ان الرفض عليك مفروض
علشان تصريحك بالفكرة
يخرج عن فتارين المعروض
تصبح موجود
تصبح...انسان
