نهارك سعيد
هشام صبح
حلمك انك تصحى الصبح
تشرب فنجان قهوة على ستاربكس
تحت سان ستيفانو
والشمس لسه بتشقشق
على بحر بيخبى
أسرار التاريخ
من قرون
تملا صدرك بنسمة هوا
مليانة بريحة
الحرية
بس خوفك تضيع ملاليم مرتبك
فى ايجار شقة
مدفونة فى العصافرة
او فى المندرة
ومتلقاش قلب نونو
يضم احلامك فى بين محندق
خلاك تعود
تقتل أحلامك باديك
تدفن نفسك وسط تراب
ووشوش
مبتعرفش تقول لبعضها
فى طلعة كل نهار
صباح الخير
الجو حر,
الرطوبة بتخنقك,
تشرب بس قلبك,
مبيرتويش,
وسط زحمة المترو,
تستنى يتفتح الباب,
وتمد راسك تخطف نفسين,
مش متلوثين بريحة التعب
وارهاق الليالى
جوه تكييف المحطة,
متلاقيش غير وشوش أكتر,
ياخدك تيارهم
تغرق أكتر,
حتى الحلم بالنفسين
بقى مستحيل,
نازل المحطة الجاية,
تجرى على الباب,
تتاخد ويا الموجة النازلة
من باب للصعود
مبقاش فاضل من اسمه غير حبه
لسه بيجاهدو
عشان يفضلو
بنى آدمين,
سلم كهربا,
زقة من واحد مستعجل بيجرى,
يسألك الساعة كام,
من غير ما يعتذر,
وميستناش يسمعك,
تصرخ
"الساعة 6ونص"
يااااااااااااااااااه
لسه على ميعادك
ساعتين
تقعد على قهوة التحرير
تطلب شاى
ويا حجرين شيشة
تشد معاهم فى حبال صبرك
تنفخ دخانهم مع ضيق صدرك
تركن علبة سجايرك
اللى دابت فى جيب البنطلون
مع دقة قلبك
لسه الميدان بيجاهد
عشان يفضله من اسمه
حبة حرية
الشمس تلهب عينيك
على الرصيف
لسه الألوف
ماشية مبتضحكش
زى تروس الساعة
دقاتهم ع الرصيف
بتخوفك
لا الميعاد يفوت
_"الحساب كام؟"
_"شاى وشيشة وحجرين,
13جنيه,
استنى باقيلك 2جنيه"
تبتسمله
تطبطب على كتفه
وتقوله
_"نهارك سعيد"
