اعـــــــــتذار .....
هالة فتحي
اعتذار لو كان يكفي باعتذر حد السما
الكلام عمره ما يوفي حتى لوكان ملحمه
باعتذر لو فيك غلطت
باعتذر علشان ندمت
باعتذر .. مش طالبه منك الا عفوك و السماح
ايه باقيلي بعد زعلك و ابتسامتك دي البراح
اسفه علشان لما باغضب
علو صوتي يقول : زعلــــت
و القلم ف ايديا يعتب
و برصاصه كتير جرحت
بعدها بارجع و باندم
و التقيك بحنان سامحت
مهما باعلن اختلافي
لسه عقلي ... عقل ست
اسفه علشان كان ف ايدي
كنز ما حافطتش عليه
كان هواك ساكن وريدي
خفت اعشم نفسي بيه
و اتجاهلت و قلت هانسى
و قفلت الباب عليه
بعت قلبك ويا قلبي
و انت راجع ... تشتريه
باعتذر ملو الليالي
قابله مهما ان كان ملام
يا اللي زي النجم عالي
و الضمير مليان كلام
عمر صوت عتبك ما جالي
و ف عينيك ميــــناء سلام
و ان زعلت باشوف سكوتك
يغرق القلـــب انهزام
باعتذر و يا ريت تسامح
عمري ما عرفتكش جـــارح
ده الجبين مليان سماحه
و الحنان مالي الملامح
باعتذر .. مش طالبه منك الا عفوك و السماح
ايه باقيلي بعد زعلك و ابتسامتك دي البراح
باعتذر بكلام و عشمي
يبقى ليك رد اعتـــبار
جايه مكسوفه و باقدم
لجل عينك ... اعتـــــــذار
اسفه
